قصيده لشاعرعبدالله بن معجب الشهراني
شارك بها في الزيارة الاخيره التي قام بها وفد من قبائل شهران
للشيخ /فارس بن ظافر الحقباني الدوسري
قبل كل سلم وكل علم الله البادي=ما اقدم على تمجيد ربي ولا ابدّي
يا خلاق يا رزاق يا حقّ يا هادي=مالك في ملكوتك شريك ولا ندّي
ما هديت من حظ فلا عاد ينشادي= وما شيدت من حظ فلا عاد ينهدّي
بعدها سلام الله لكم يا هل الوادي=يا عوق العدو لا قام باغي ومتعدّي
رموز الوفا والطيب تيجان الامجادي=بحور السخا اللي بالعطا مالها حدي
اقود المدايح من وفاكم وتنقادي= واشرّف بها في مرقب الشعر واعدّي
يا جمع الدواسر يا شغاميم الاولادي=يا متوارثين الطيب جد باثر جدّي
يا هل صحفةٍ تندى واهل هجن وجيادي=ملاذ الدخيل وستر مردوعة الخدّي
لكم راية بيضا على روس الاشهادي= وهيبة شموخ نوخت كل متحدّي
وانا وقفتي قدامكم ثالث اعيادي= لاوقفت قدام المطاليق من قدّي
وقفت اخدم ربعي من اباي واجدادي=ومن اخواني اللي توفي الكيل والمدّي
واخدم الشيوخ اهل الزعامه والاسيادي=واخدم الخوي من كل قيف ومن بدّي
هذولا اشهران المجد خطلان الايادي= نجوم يقدي نورها كل متقدّي
عدود الجميل مرّوية كل ورادي= سلامٍ على الصاحب ظلامٍ على الضدّي
يكفّيهم انهم عرقلوا سير الاوغادي= وتصدوا لجيش اللي غزا البيت مرتدّي
لفوا عند أميرٍ يرفع الصوت وينادي= يعشّي على درب الهشاشيل ويغدّي
أميرٍ من الحقبان في الطيب متمادي= ما يجزي الوفا والوصل بالهجر والصدّي
ابوظافر اللي يحفظ الملح والزادي= ولا ينكره لو ينكره كل متردّي
راعي سمعةٍ من باب صنعا لبغدادي= تفوح بشذى اليشموم والعود والندّي
ومادام الحديث يجر للمسك والكادي=ما ننسى فعول الشدّي ونعم بالشدّي
جبل من جبال الجود للجود روادي=بحاله وماله للمواجيب متصدّي
وعسى اللي تسبب في تجماع الاجوادي= وزاد المحبه بين الاجناب والودي
يضّيف بدار الخلد في ظل وبرادي=لاجاوا العباد وعدّهم ربهم عدّي
رحل تاركا ذكرا كما النور وقادي=وانا ودّي اطرّي فعوله ولاودّي
ومسك الختام ازكى صلاتي على الهادي= عدد مايموج البحر بالجزر والمدي