مايموت الشوق واغصانه نديه=ولايموت اسمٍ يهذري به لساني
يشهد الله كل ماتطري عليه=تسرح افكاري وأعيش بجو ثاني
سامح الله وجهها ميته وحيه=وسامح الله قلب أطيعه ويعصاني
كثر مازادت على الكيه بكيه=كثر مغليها على قاصي وداني
كثر ماتتلى الخطيه بالخطيه=كثر ما اعذرها وتحظنها المحاني
عشمتني لين قلت الحب هيه=وضيعتني لين ضعيني مكاني
أتاثر من هديل الراعبيه=واتأثر من "زماني يازماني"
والهوى ملعون ابوه وحي حيه=لو أنكس هامتي زلزل كياني
يافقير الحب أنا نفسي غنيه=والغلا في خافقي رمز ومعاني
كم هنوفٍ قبلت ظاهر يديه=وخطبت ودي ورغبت في حناني
وأتقافا في غرور وعنجهيه=ماتهز اركان ثقلي وأتزاني
الا (.....) جيتها كلي هديه=والهوى مابين وردي وارجواني
أبدويٍ هام في حب بدويه=ومن رداة الحظ ماكسب الرهاني
لين صفى لاشداد ولامطيه=عودت عشر الهوى تسع وثماني
وين قيس وفين ليلى العامريه؟=يالحبيب اللي شريته ماشراني
أحسب أنك في هجير الصيف فيه=وأحسب أنك قبل مانغرق مواني
ياحسايف يامزون العقربيه=يوم هلت حب واشواق وتفاني
وسقت فنجال الغلا من شاذليه=وأنكسر في يدك والخوف أعتراني
لاحت الفرقا وأنا عندي وصيه=اسمعيها كان لك قلب وأذاني
أحفظي حق المرابيط القويه=ولك شكري ولك ودي وأمتناني