يــــــــا الله يا والي على كل والي=يا خير من يدعا لكشف الجليله
المالك المعبود محصي الرمــــالي=الكون والدنيا وما به فهي له
ما كان أول له وما كان تالي=ملكه يدير به على ما يجي له
يقضي ويمضي قـــادر ما يبالي=والخلق ما تفعل بلا امره فعيله
ما له شريك جلَّ فوق متعالي=علمه أحاط ابدقها والجليله
أشهد فلا غيره إلـــــــه ولا لي=ربٍّ سواه أخشاه وأرجي لنيله
يا واحدٍ فوق السموات عالي= من سطوته كلَّ الخلايق ذليله
يا فارج الشده بضيق الحوالي=إفرج لعبدك يا منجي خليله
وانظر بعينك يا با الافراج حالي=فرد غريب والمصافي قليله
وحيد مالي غير ظلك ظلالي=ذليل مالي غير عزك وسيله
يا راحم أرحم شيبتي وأنخذالي=يا جابر اجبر عثرتي والفشيله
والطف وناظر يالولي في سؤالي=لا تواخذني فيما مضى لي من فعيله
لا اخوان لا عمان لا من خوالي=ولا من صديق في الورى نشتكيله
لو كان ما يجلى سوا الله جالي=ما شفت عبد هرجته لي جميله
تقطعت وذم العرى والمدالي=من جملة الخلان والمستخيله
وقضيت من المخلوق ما حد بقالي= إلا انت يا للي ما يخلي عميله
عادوني كل الناس شرق وشمالي=ولا بقا غيرك ذرا ألتجي له
شافوني مذلول ٍ وحيدٍ لحالي=ولا لي من الفزعات مومي شليله
وأنا بعون الله امتانٍ احبالي=متجودٍ بحبال منشي المضيله
لو كان كل ٍ له صديق اموالي=اقراب واخوان واللي قبيله
أنا لي اللي زابنه ما يسالي=جزل العطا مبري الجسوم العليله
إلى دعو حبانهم فز بالي=رفعت طرفي له وقمت أشتكي له
ويلا تنادو بينهم للنوالي=ناديت باسمك يا منشي المخيله
ومن لا ذبك ما صار بالضيق تالي=يصير الاول ولو كانت أعظامه هزيله
ونا دخيلك يا عزيز الجلالي=حاشا كرم جودك يضيع عميله
بريت من غيرك بحالي ومالي=وزبنت أنا بحماك عن كل ميله
من شر خلقك لا يذ بك ولا لي=غيرك ملاذٍ شامخٍ ينعي له
يا رب مالي غير جدواك والي=ون كان خليتن فلا لي عقيله
يا عالم بالمخطيه والعدالي=تشوف مالي غير عدلك وسيله
فلا تواخذني بما ضي فعالي=ياساتر العورات مضفي جميله
لو كان ذنبي راجح بالجبالي=عفوك عظيم ليس ذنبي عديله
أطلبك تقبل توبتي عن خمالي=واطلبك عني كل كرب تزيله
واطلبك تغفر لي وتصلح اعمالي=يا مزبن الخايف إلى باد حيله
مولاي لا منجا ولا ماتجا لي= إلا انت ياللي ما يذير نزيله
يا فزعة المظلوم منشي الخيالي=يا فارج الشدات لو هي ثقيله
أفرج لمن بالحبس دونه رجالي=وابواب واقفال وحصونٍ طويله
في وصط دبابٍ غريب الحالي=أظلم ولا أدري وش نهاره وليله
متروك مالي من يرد المقالي=لا حد يبي قولي ولا حد يشيله
ولا احد غيرك عليه اتكالي=إلا انت يا منجي دريك الدبيله
ما دام تنظرني وتسمع مقالي=ما خاب عبدٍ يدري انك وكيله
يا سامع بالليل حسَّ النمالي=وصوت يونس في البحور الطويله
الماء وضرب الموج مثل الجبالي=فوقه اجيبت دعوته وتهليله
يا مصرف الايام هي والليالي=في قولته كن يجر القلم بتعديله
أدعوك باسماك العظام الجزالي=وابحق ما خصيت لك من فضيله
وابحق عظمة قدرتك والجلالي=وابحق نورك والفعال الجميله
وابحق ما نزلت من أول وتالي=تجيرني من شر خلقك طويله
وتنزل كربات علينا اثقالي=تغطلست مالي سوى الله دليله
أمن على قلب يجتول اجتوالي=يا مسكن الروعات سكن جفيله
أسرع علينا يا قريب النوالي=لا تجعل الشده علينا طويله
يا فارج الكربه بضيق الحوالي=أومر لعبدك بالفرج وتعجيله
واجل الأمور المعظله والجلالي=عني وكل عبد مسلم يندعي له
وصلاة ربي عد رمل السهالي=على نبي وضح الله دليله
صفوة قريش اللي مشى بالعدالي=نبينا المعصوم عن كل ميله