السلام عليكم ورحمة الله وبركاته
في البداية،، أود أن أقول رحم الله شاعرنا دخيل الله بن محمد الشكره آل حسن الدوسري ، الشاعر الجزل الذي أعتبره كالمدرسة لي بما أنني شاعر ، لما تحتويه أبياته رحم الله من معاني ومفردات قويه ومعبره ، وكان الشاعر من الذين مثلوا قبيلة آل حسن الدواسر خير تمثيل في مجال الشعر وغيره ، لما تسطره أبياته في مدح وثناء على قبيلته الدواسر و آل حسن ، ولما تحتويه أبياته من حكمه ومعاني يستمتع بها القارئ ، فالشاعر المرحوم بإذن الله يعتبر من عمالقة الشعر في الجزيرة العربية ، ومهما نحاول أن نوصف هذا الشاعر فاللسان يعجز في وصف هذا العلم والشاعر المرحوم بإذن الله دخيل الله بن محمد الشكره آل حسن الدوسري رحمه الله واسكنه فسيح جناته هو جميع أموات المسلمين...
أبدا كلامي وأذكره سبحانه=رب(ن) كريم(ن) خالق(ن) أكوانه
أبدا كلامي بالإله الواحد=ملهم رسوله سنته قرآنه
بدع المثايل في ضميري جاني=واشتب في قلبي وفي شريانه
شاعر ولكن مايقدر شعري=كود الذي يعرف ترا عنوانه
ماني بشاعر بالمجله هايم=دور على الشهره وحظه خانه
ماني من اللي كل عرس(ن) حاضر=يلقي قصيده يومي بذرعانه
وماني من اللي يزلقون الشارب=لا طار طيره لا تعلى شانه
أكتب قصيدي لا تهيض صدري=وإن هاض سيل(ن) يخترق جدرانه
أكتب على اللي ورثوه أجدادي=وآغوص في بحر الشعر وأركانه
امن (السديري1) أستغل الحكمه=حكمه عساها تدخل بميزانه
ومن المعالم شاعر(ن) ودعاني=(شلعان2) لا يمكن ترا نسيانه
وإن كان ودي شاعر(ن) بالمعنى=عندي (دخيل الله3) وشعره عانه
وإن كان ببدع في فنون القلطه=(أحمد4) ترا شاعر بكل ألحانه
وإن كان ودي شاعر(ن) متواضع=ذاك (الغييثي5) لابتي خلانه
و(دنداننا6) شاعر يمثل معجم=بحر(ن) كبير وحاكمه بأوزانه
شعارنا واجد ومنهم نفهم=يكفي فخر زايد ترا صبيانه
منهم توفى مير ربي راحم=يرحم عبيده نرتجي غفرانه
ومنهم عسى ربي يطول عمره=حي(ن) عسى الله يرحم ويرعانه
حبيت أوضح بالقصيده قصدي=حبيت أوضح للشعر سيسانه
ذا الوقت شعر المصخره متفشي=شعر(ن) يغث المستمع بآذانه
أحدن يمجد دوفي دوف ودنهل=مايدري انه فالختم صلبانه
وأحدن يهوجس في بنات(ن) مروا=ليله طويل وقمرته سهرانه
وأحدن يدور فالقصيده مكسب=يمدح ملوك وعيشته بلسانه
شعار لكن المعاني ولت=هرج(ن) كثير وشلة(ن) خربانه
يا (بوصقر) دام الدواسر عزي=أركب على اللي يرتجف شكمانه
بلغ سلامي كل واحد منهم=قله تراني واحد امن أخوانه
سلم على تغلب وجدي زايد=ياسعد منهو أصبحوا جدانه
هذا كلامي وأفهمه يافاهم=عساك تلقى عملة(ن) ربحانه
قلت القصيده قاصد(ن) لي مقصد=قلته و وضحته مع برهانه
والختم صلى الله عليه وسلم=محمد اللي للهدى يهدانه
1):الشاعر الأمير / محمد بن أحمد السديري..(رحمه الله)..
(2):الشاعر / شلعان بن ظافر الوداعين..(رحمه الله)..
(3):الشاعر / دخيل الله بن محمد بن دخيل الله الشكره..(رحمه الله)..
(4):الشاعر / أحمد الناصر الشايع..(أطال الله بعمره)..
(5):الشاعر / دغش بن بطي الغييثات..(رحمه الله)..
(6):الشاعر / عبدالله بن محمد الرجبان..(رحمه الله)..
الشاعر / بدر بن صقر العجالين الفرجان آل حسن الدوسري...