يسعد أوقاتكم بالخير ..
قيل (أن حنين المرؤ لماضيه دليل على وفاءه)
و(نذاله) أشغلت فكر رفيقي بترميز بيني وبينه
سلطـان بالله شـف خاطـرك مامـرّه=طيف(ن) لفا البارحه وأشغلّي أفكـاري
جانـي بغـدرا مغيـر نجـوم منثـرّه=عقب أنتصف ليلي ابهجعات الأسحاري
مدري لفا من شمـال أو ديـرة المـره=الموجب أنـه عليـه آثـار الأسفـاري
قلت أسترح وأرتشف فنجال ذا المـره=من دلة(ن) هي نديمي بأطرف اوجاري
ونوّخ ذلول(ن) من الارمـاس منظّـره=وليا ركد ثايرَك حمّض باالاخبـاري ؟
قال أنت جاحد..نسيت الفضل بالمـره=أسألك بمصورك،،خلاقـك،،البـاري
بالله ماتذكر الضحكه..وأبـو غـره=والعيد،،والصيد،،والبـراق سمـاّري؟
نهلت عمري وجـاك العـز مـن دره=وبدّلت عرفي ومعروفي بالانكـاري
وجحدتني يوم أنـا ماعـاد لـي كـرّه=الله يبيحك عدد نجم(ن) حدر ساري
قلت أنت هم روح(ن) بسيرتك مجتّـره=أليـا تناسيتـك يجيبـك لـي الطـاري
تشوف حالى تحسب الـروح مستّـره=عليـك لـولا التجلـد هلـت أعبـاري
ميت بلاماك فـي بـرده وفـي حـره=وظلالك عذري وبلسم جرحي العاري
لو تنفع (الليـت) ليتـي كاسـر الجـره=لوّي لغيب ألليال المجهمـه قـاري !!
من عقب ماروضة الخفـاق مخضـّره=غدت هشيم(ن) ذرا من فوقـه الـذاري
وضلوعها الحدب أتّـل النـوح وتّجـره=وأنـا آداري آخـاف تبيّـح أسـراري
وتملكتنـي تعاسـه مالـهـا ضــره=وأمسيت مثل الغريب بداخل ديـاري !!
أقفيت وأخفيت عنـي وجهـة الجـره=وخليتني للعـذاب ولانـت بـي داري
واليوم تلفي ياضيـف البـال تتّشـره=تطلبني بحق وألا تسبـر أغـواري ؟؟
قال آسف..والظن قبلي ماحد(ن) سـره=مير السموحه لذنبي وأقبـل آعـذاري
أنا أحسب انـك سليـت بعالـم الـذره=وأثرك وفي(ن) عريب(ن) للشقا ضاري
وأقفى ولاَعـاد لـي بخيـره وشـره=ومع الهواجيس تهت وطال مشواري ..