قلبي معك يا ساحر القلب لو ضاع
في آخر الدنيا ترا فيك مجموع
أنت عبير الروح لا قلت ملتاع
فاح الغدير اللي على الخدّ مطبوع
موتي العيون اللي على الكون أوساع
تغرس لها غابة وَلَه وسط الضلوع
ما هو بقلبي إن نسى الحبّ أو طاع
الحبّ أصله من أصل كان ممنوع
يا سيدهم آمر وأمرك بينطاع
قبل اتكلّم منّك الرمش مسموع
ياللي عليك الورد والناس ...إجماع
نظرة عباير منّها الذبح مشروع
يا راس ما فاد الزمن فيك إخضاع
كيف الهوى سوّاك للزين مخضوع
كم فيك يا سيد المخاليق أتباع
الورد والأحلام والليل وشموع
الحبّ قطرات ومن يَـدّ منّاع
ما للمحبين غير نظرات .. مطموع
يمشي معك عقد القمر نوره خدّاع
ونورك زياده بالفراشات متبوع
عيّا يتوب القلب والحبّ أوضاع
عيّا وهو مسكين بالشوق موجوع
وش مشيتك أحلى من العطر ضوّاع
في الجوّ إنت والعصافير وادموع
الغيم منّك يا الندى فيه أطباع
هو يشبهك في مشيتك وألف موضوع
...............................................