::: مـنتدى قبيلـة الـدواسـر الـرسمي ::: - مجاراة بين الشاعرين محمد بن فنيس والشاعر فارس بن محمد الدوسري

اليكم هذه القصيدتين من الشاعرين المبدعين

البارحه فكرت والفكر محتاس . . وخيم علي حاجوس ليلٍ شعاني

اساير افكارٍ علي مالها اقياس . . طرس الحبر صارت عليه تحداني

هب الهوا الشرقي نسايم ونسناس . . وجات المثايل تدرج بـ المعاني

يابومحمد صابني اليوم هوجاس . . رد البرا وميح الرشا فـ السواني

من عقب ماشعيبٍ علئ الجم غطاس . . اشوف من عشره يعود ثماني

الصحف جفت والقلم صابه ايباس . . والبال يبقى معك شاهد عياني

الباب مفتوحٍ ولا فيه حراس . . اسرج خيولك ياوسيع البطاني

الضلع ماله راقين غير قرناس . . مثل البوارج لارست فـ المواني

تراء الحجر يلمع كما لمع الالماس . . تساوت الثنتين شان الزماني

من عقبك الساحه غدت في تمنحاس . . وكلٍ بها مثل الذلول ارزماني

تقلى العوارف مالهم ركن وجلاس . . والى القليصه له صيت ومكاني

لكن انا بشره عليك وعلى الناس . . مثلك ترى في موقفه صيرماني

لنك تراك امعزب الجد والساس . . لك حقك لربوعك ولازم تباني

الضوح فرقٍ بينه وبين الادماس . . النور بيّن والدجى مخفياني

هذا قصيدي جاك والعفو ياناس . . والذيب يفهم ياعريب المجاني

الشاعر / محمد بن فنيس الدوسري

الرد . .

البارحه عيني فلا طبها نعاس . . سهران لين الصبح شعشع وباني

على الفكر يردّنه اخماس واسداس . . ورد النصاء عقب الظماء ريهجاني

من القصى والبعد يشدن الاقواس . . ومن فوقهن مروين حد السناني

قافٍ لفاني منك ياطيب الراس . . حرك هواجيس تدك المحاني

واخذت من بيض قراطيس قرطاس . . واخترت عن هزل البيوت السماني

يامحمد بن فنيس عن كثر الارماس . . البدو ماتجهل سهيل اليماني

وشعيب لو بديرتن مابه اوناس . . معروف عند اهل القرى والمباني

والجم راهي كان الاكباد يباس . . ياهل الظنون اللي بليا اتزاني

وان غبت غايب عن قرينين الانعاس . . وعن موطنٍ فيه الكديشه حصاني

وسوقٍ من الارباح يحرى بالافلاس . . ولو زادت الثنتين ويش الحساني

قصه جحا ولا سواليف ابو نواس . . وليلً مساريه على دان داني

ومن الزمن ياشاكي الباس لاباس . . مثلك نشوف اللي تشوف وتعاني

وفي حق ربعي لو على قطع الانفاس . . ماغبت ولا غايب يكون الهداني

وكلن على جسمه يفصل له لباس . . وكلن على رايه يفك العناني

تم الجواب اللي على قيس وحساس . . ويصح في قول الحقايق لساني

الشاعر / فارس بن محمد بن بداح الدوسري