مانسيت الصاحب اللي له حقوق جسام = عندي وعند المناعير قدره معتلي
خص عند اللي يعرفه من الناس الحشام =كيف لا وابوه نايف ولد شين الحلي
من رجال الطيب واهل الوفا واهل المقام =في الكويت وهاهنا طيبهم متأصلي
ربعنا الرجبان عز الخوي عون المضام = في المراجل قسمهم وافي ومدبلي
اهل خيل واهل جيش واهل شلف وحسام= سعد منهم فزعته في نهار يصطلي
واهل غرس ونخل ما حط من دونه حزام =مخشرين الجار به للطراقي مدهلي
ماتهرجنا مجامل ولا نخشى اللئام = الحقايق عدها مايغيض ويزعلي
ولا لنا غايه ومقصد ورا هذا الكلام = جا مجال وربعنا كفو والمنزل علي
والله اني معه في كربته طول الدوام = لو جهلها غيرنا والله اني ما اجهلي
للرفيق اللي سواته مكانه وحترام =وفي الشدايد حقه اكبر ولا غاب اسألي
ذي عوايد لابتي مع رفاقتهم حرام =ما تخلى ساعة الضيق اوتتبدلي
تاقف وقوف يشرف لياشتد الزحام=لين ينفك الزحام ويحل المشكلي
جارها محشوم والضيف مادور يدام = في بلدنا نكرمه حيل يردفها طلي
مدح ربعي والاشاده بهم حق ووسام= دون قاصر في القبايل وقولي يشملي
ومثل ابو نايف وشرواه في شرق وشام=غيبته لا غاب يفقد وقرم مشكلي
ان زهم شاش وتعزوى وميقافه شمام =لوظروف الوقت عسره ما عذر واجلي
كل محفل للقبله مع الصف الامام = شاعر محسوب مهوب شاعر يكملي
ولاياكم واحد غيبته برد وسلام =ماتضايقنا ولا جاء مجيه يدبلي
في الرخا يهرج هروج مكاسبها آثام=ولا حتمى الميقاف ولى مع الفج الخلي
وفي اللوازم يختفي مثل خفاش الظلام= لا انتها اللازم تبين بصوت جلجلي
يتدخل في الامور الصغاير والعظام = والعظام الها رجال تحل وتفتلي
يتمرجل بالحكي وهو حماي الجهام =وهو من هذي وهذيك كفينه خلي
في المواقع والمحافل وصل حد الغمام = هكذا فجأه ظهر دون مجد اولي
رزة ماهي على ساس تاليها هدام = قلتها ويقولها كل عقل ممتلي
ولانريد انشط بالوضع عن سير النظام= والقوافي تزدحم في هجوس خيلي
ولانريد نطول الماد ونثير العسام =والعلوم اطوال وعراض والمخرج ملي
لكن الموجز يكفي هل العرف الفهام=وغيرهم من قولنا ذا يضيق و يجفلي
ناذر نذر ويشهد علي رب الانام =ان ااتابع حالته ونشده واو صلي
والله اني من عرفت الخبر جوي كتام =والفكر مشغول والجوف نار تشعلي
اتصلت بصاحبي انشده ويش العلام =وسط قلبي عبرة كيف بيجاوب علي
قال يامرحب وانا طيب وضعي تمام = مو منن باللي حصلي وبالله مملي
وهو في لندن يعاني من هموم وسقام = ستت اشهر صابرمحتسب متحملي
من نشده يقول طيب على احسن مايرام = ماجزع ولا سخط لامر محكم منزلي
ابتلاه اللي خلقنا من تراب وعدام =اختبار له من الله رضى به واقبلي
معه في الغربه شقيقه تعداه الملام = من معاناته يعاني ويخفي ويغلي
غربو من دارهم غربه ماهي سلام = لا ولاهي سجة في الدير تتجولي
لو سما لندن خيالي ولاهو بالاحلام =مالهم راده بها لومطرها يهملي
مايبون الا السلامه ويرجون السلام =ان ماحل ابدر وسط لندن ينجلي
معهم ارجال الوفاء معهم ارجال اكرام =تبتهل لله وتطلب معافاة الشلي
وستجاب الله لهم والطف ببدر التمام =وزال باسه جل شانه مغيث الممحلي
وعاد لاهله طيب عاد لكويت السلام =ولشيوخ للثقيلات عنهم تنقلي
وعاد لرجال على شوفته طيب حيام =في غيابه ما هتنو يوم عاد تهللي
عاد سالم ومتعافي عسى الصحه دوام = وان ماصابه طهور لذنبه يعسلي
ياعساي اوفيت في واجب يلزم لزام =وان حصل مني قصور فعذري سجلي
وسلم وسلم وميعادنا بعد الصيام = ذا وصلى الله على اخر نبي مرسلي