بسم الذي من ضياء وجهه ومن نوره = انور على مشرق الدنيا ومغربها
رب ٍ خلق كل شي ودبّر أموره = الخلق محصيه .. والاقدار كاتبها
بداية ٍ بأسم رب الكون مذكوره = وبداية ٍ ما بدت بالله .. عقّبها
من بعدها .. حضّر الشاعر من شعوره = مثايل ٍ من بنات الفكر جاذبها
لو المثايل بعض الاحيان .. مغروره !؟ = تِفحم صدور الشواعير بتعصّبها
الشعر .. مقناص له ديره .. وله دوره = و شريدة الصيد .. ما كلٍ يجيك ابها !!
وأنا ليا شفتها .. حذره ومذعوره = جنّبت عنها .. وأنا عيني تراقبها
ولقفت للصيد لين أعقّب اسبوره = ولا ارمي الشرد .. لين يزين مضربها
وانقى درّرّ الشعر وأغوص فبحوره = وافتل معانيه وانقضها واركبها
الشعر .. درة بحر عسره ومخطوره = ماهي مطيه من ادنى السوق جالبها !!
و بموحد الدار زان الشعر و حضوره = وجبنا له اغلى درّرّ البحر وأطيبها
(( الدرّه )) اللي تليق بكاره و كوره = الغاليه .. ما تساق إلا لصاحبها
تساق لموحد ابلاده وطابوره = بالعزوة اللي على الأسلام مذهبها
له عزوة ٍ في نهار الكون مشهوره = اليا اعتزى يسكت الاعداء ويرهبها
يمناه .. بالخير , قبل الشرّ .. مآموره = واليا دعى الشرّ ما تخطي ضرايبها
تبطش , وترفى الخمال , وتستر العوره = موهوبة ٍ كثر هيبتها وهايبها
حر ٍ يخلّي الحرار الشقر مصقوره = عن مخلب ٍ تقصر النّدرّ مخالبها
محنك ٍ .. يستمد الشور من شوره = محكحك ٍ .. عاصر الدنيا وجربها
له عشقة ٍ .. عندها الفرسان منحوره = عشّاقها دونها .. تفتل شواربها
غندورة ٍ .. ما تشابه كل غندوره = الموت الأحمر .. تكدّه مع ذوايبها !!
وجاها معزّي بجمع ٍ تضرس انموره = يا معانق الموت .. يا معانق ترايبها !!
واضحت بهم راية التوحيد منصوره = و روس الجهل قِصت .. و رِزت نصايبها
وقت ٍ مضى .. وانقضى .. لا عادت اعصوره = ومن هووول ما نسمع احداثه .. نكذبها !!؟
واليوم .. كل ٍ يعرف احدوده و دوره = تنزل به الناس منزال ٍ يناسبها
واللي عدى وأعتدى .. يبرك على زوره = نفس ٍ تبي الشرّ .. تلقى من يحاسبها
ما فيه نفس ٍ عن المآجوب معذوره = ( النفس وش عذرها في ترك واجبها ؟ )
يامآ علينا لكم يا أعيال .. أخو نوره = من واجبات و عهود ٍ ما نخون ابها
أولهن : البيعه , اللي ما بها بوره = في ارقابنا لين تلقى الروح طالبها
وأخيرهن : دعوة ٍ بالغيب مآثوره = تطلب قريب ٍ مجيب ٍ ما يخيّبها
تحمى وطنا من الشيطان و اشروره = وتعز ّ حكامنا .. وتعزّ جانبها
والمذهب .. اللي جنود ابليس جمهوره = ماهوب غالب .. وأهله ابليس غالبها
لـ أبليس ناس ٍ ينوخّها بباكوره = ومع كل درب ٍ نهى الله عنه يشعبها
يلقى لهم جرة ٍ مع كل مجروره = والنار مثوى الوجيه اللي يسحبها
ومن شذّ عن دربنا ما طالت اشبوره = ايديه قدام تحذفنا .. نتربها